利用新例舉報藍店 百害而無一利
首先呢個新規例好明顯就唔係為抗疫（真係有心抗疫一早封關），只係為咗進一步打壓，我哋呢邊仲走去「幫手」舉報就即係承認其正當性；
其次，舉報只會造成更多嘅互相舉報，令社會更加撕裂，成全中共最想見嘅群眾鬥群眾
先唔講有啲只因為有員工講咗一句「廢青搞事」就被標籤為「藍店」嘅，係咪真係需要被視為敵人而趕盡殺絕，
就算係真．藍店，我哋舉報佢哋係唔會令佢哋覺醒／仇警，
只係令佢哋更仇恨黃絲，藍營會發動更多人去搞黃店，最後可能只係我哋損失更大；
而且最大嘅問題係：唔通你真係信黑警對藍店會公正地執法？
如果係同黑警有密切關係嘅藍店，被舉報後啲黑警好有可能都係循例咁去做個樣，唔係以為咁樣可以打擊到對家呀嘛？
可能你會話：咁啲藍屍真係破壞防疫工作，要求政府做嘢係天經地義
但你唔係唔記得咗我哋一早就冇咗為香港人做嘢嘅政府（尤其執法部門），得返個專門整死香港嘅恐怖組織呀嘛？:0)
要求恐怖組織做正常政府要做嘅嘢根本就多9餘，主動走去配合其規例更加係可笑
有時間嘅話，做多啲文宣又好，強身健體又好，睇多啲書、努力學多一兩門技能搵多啲錢都好
太過怒氣難平報仇心切嘅話，就做個真勇武去對付下啲戰犯
記住真正嘅敵人，要贏仲有好多更有意義嘅事要做
Search